Genesis 9
Maaron imbu saveeŋ tomania Noa
1Maaron ighur poia tooni izaa to Noa tomania natŋa, ve isaav pazi ighe: “Apoop, ve amasa amin naol, ve aleep irau taan muul. 2Ŋgai maata maata tau tileep izi taan, tomania man, iigh, ve gabua soroksorok tau tikakarau ila taan, ene aat matazi izaa ve tiroi payam. Yau naghur zi tilat nimamim. 3Muuŋ, naghur gabua tau titum ila taan timin aniiŋ payam. Ve aazne, yau napul gabua matazi yaryaare ta naol ne payam paam, leso aghan zi.”4Gabua eemon tau yau naŋgalsekin gham pani. Gabua miiza tau siŋ igheen ila na, yam aghani sov. Pasaa, siŋ ta imin puughu pa gabua tileep matazi yaryaare. a
5Tauvene isaav ighe ŋeer eta, ma ŋgai eta irav tamtamon imaat, yau Maaron naghur atuya pani tauvene: I aat imaat paam. Leso iyat siŋ tau i iliŋi na.
6Tauvene ŋeer eta isaav ighe irav tamtamon ite imaat,
ene pale i paam tiravu imaat. Leso iyat siŋ tau i iliŋ na.
Pasaa, Maaron ighur tamtamon tigham i tauu naagho. b
7Ra Maaron isaav muul pa Noa toman natŋa ighe: “Yam apoop, ve amasa amin naol kat, ve aleep irau taan. 9Ve alooŋ. Yau naghe nambu saveeŋ pa yam, ve paaghu tsiam tau pale tivot murei. 10Ve yam mon mako. Gabua matazi yaryaare naol isov to nughei ve su tau tileep tomani gham ila waaŋ loolo, ve yamŋa avot ala muuri gha aazne aleep izi taan ne, saveeŋ mbuaaŋ tsiau tane iŋarui zi paam. c
11Yau nambu saveeŋ ariaaŋ payam tauvene: Irau nagham yaa ivon muul toman tapiri tiina to navaghamunia gabua matazi yaryaare mako. Ve taan tauvene paam. Yaa irau ivaghamunia muul mako.”
12Ve Maaron isaav muul ighe: “Taliŋbuuz tsiau tau igheen izala taitai, ene naghuru imin ilaal pa saveeŋ mbuaaŋ tsiau tane. Saveeŋ tane, yau nambua tomani gham, ve gabua matazi yaryaare isov tau tileep tomani gham izi taan. Saveeŋ tane pale iyooz ariaaŋ taghon taghon gha ila. Tauvene taliŋbuuz pale imin ilaal pa saveeŋ mbuaaŋ tau yau nambua tomania gabua naol isov tau tileep izi taan. 14Murei, isaav ighe yau naghur taitai iyooz tomania taliŋbuuz, ene aat matag iŋgal saveeŋ tau nambua tomani gham ve gabua matazi yaryaare isov. Saveeŋ mbuaaŋ tauvene: Yaa irau ivon le ivaghamun gham muul mako. 16Tauvene taliŋbuuz ighe ivot tomania taitai, ene aat naghita, ve matag iŋgal saveeŋ tau nambua tomania gabua matazi yaryaare isov tau tileep izi taan. Saveeŋ tane pale iyooz tauvene taghon taghon gha ila.”
17Tauvene Maaron isaav pa Noa ighe: “Taliŋbuuz, ene imin ilaal pa saveeŋ tau yau nambua tomania gabua matazi yaryaare isov tau tileep izi taan.”
Noa ve natŋa tol
18Noa natŋa tol tau yesŋa tileep waaŋ loolo ve tivot muuri na, ezazi tauvene: Sem, Ham, ve Yapet. Ham naatu, ene Kanaan. 19Eval tisov tau tileep izi taan, ene tivot ila to Noa natŋa tol tawe.20Noa, i ŋeer to ghamuuŋ uraat pa uum, ve i ta ivazogh vaen imin maata. 21Saawe ee, i ighun vaen le iyamaan tauu mako, ve kawaal tooni imaruat. Tauvene igheen tiini ŋginaaŋa ila balbaal tooni loolo. 22Noa naatu Ham, tau Kanaan taama na, ighita taama igheen tiini ŋginaaŋa, ve ivot ila muuri gha ipaes pa tooghŋa. 23Eemon Sem yesuru Yapet tigham uuli ee, ve tisiki izala avarazi, ve tilaagh pa murizi tila, ve tipoon tamazi pani. Pasaa, lolozi pa tighita tamazi tiini ŋginaaŋa mako.
24Saawe tau Noa iburig gha ŋgar tooni ighazooŋ, ilooŋ tighe naatu Ham ighita igheen tiini ŋginaaŋa. 25Tauvene isaav pani ighe:
“Pataŋani tane pale iŋarui Kanaan.
I tomania paaghu tooni pale timin besooŋa sorok pa toŋvetaz toozi.”
26Ve Noa ighur poia izaa to Sem gha Yapet tauvene:
“Iit tapakur Yoova. I Maaron to Sem.
Kanaan paaghu tooni pale timin uraata sorok pa paaghu to Sem.
Ve Yapet paaghu tooni, Maaron pale igham zi timasa timin naol, ve izuur taan toozi ila imin tiina.
Yesŋa Sem paaghu tooni pale tilup zi timin eemon.
Eemon yes Kanaana pale timin uraata sorok pa Yapet paaghu tooni.”
28Yaa ivon toman tapiri tiina le isov, ra Noa ileep muul irau ndaman 350. Tauvene ndaman tooni imin 950, ra imaat.
Copyright information for
TUCT